中環出更：慈雲山重災 岑宇軒捕獲民政專員 追問全區檢測得個吉
香港爆發第三波疫情，慈雲山情況尤其嚴重，黃大仙區議員岑宇軒尋日「野生捕獲」民政事務專員黃智華，仲向佢爭取喺慈雲山進行全區檢測，但得到嘅回應似乎比較冷漠。
政府為疫情重災區慈正邨居民安排病毒檢測，當區區議員岑宇軒尋日朝早喺慈正邨協助派樽仔嗰陣竟然撞到黃智華，仲形容佢係黃大仙區「稀有精靈」。岑宇軒不停追住黃爭取喺區內實行全區檢測。
黃智華眼尾都唔睄吓岑
岑宇軒將追問片段放上社交網站，見到黃智華只係對提問答話「聽到、聽到」，但就冇停低回應，仲愈行愈遠，真係眼尾都唔睄吓岑。期間仲有兩位疑似係陪同黃智華嘅職員，擋住岑宇軒，唔畀佢接近黃智華。
岑宇軒話一早預計民政處同區議會關係差，但冇諗過惡化得咁快，而黃智華仲要係喺今個月十八日先新上任。岑話只係想爭取全區檢測，同政治無關，但一直都聯絡唔到民政處反映意見，難得今次偶遇黃智華以為可以直接溝通，又批評黃態度冷漠。我哋曾經就事件向黃大仙民政事務處查詢，但截稿前未有回覆。
卓妮