中環出更：曇花火龍果花易撈亂 梁福元現身解說
受到疫情肆虐，好多產業都停工，但本地農業反而步入收成期喎。十八鄉鄉事委員會前主席梁福元話六月至年尾都係火龍果嘅當造季節，近排就大面積咁種植火龍果，但就話好多人會將曇花同火龍果花撈亂，仲喺社交平台講解有乜分別。
梁福元話普遍嘅中國南方地區都適合種植火龍果，但因應疫情關係，少咗人去本地農場參觀。雖然佢冇得為大家親身解說，但就喺社交平台講解曇花同火龍果花嘅分別。佢話好多人所講嘅「曇花一現」之中嘅曇花同火龍果花相似，但其實唔係同一樣嘅嘢，但兩種花都會喺夜晚開花，都算係難得一見嘅。另外，佢近期收穫火龍果，嚟緊九月份仲有十幾斗嘅絲苗白米等住收割添！
羅庭德約成班人去插秧
上水嘅絲苗白米亦已經成熟，北區區議會主席羅庭德早前聯同一眾義工幫手收割。羅庭德話早喺幾個月前突發奇想，就約埋成班人落去插秧，依家稻米成熟，就順便體驗吓點樣收割。佢話雖然見到豐收好滿足，但落田做嘢比想像中攰好多，腰痠背痛等後患足足持續三日！雖然係攰，但佢仲話打算喺八月份同本地農場商討種植通菜，連腐乳廠都聯絡緊，打算夾份賣腐乳炒通菜畀街坊咁話喎。
鍾意務農生活嘅仲有議員梁志祥，佢每日踩單車去朋友屋企幫手耕種，話保持健康之餘，仲可以陪吓老婆喎。被問到種乜嘢？佢就話自己鍾意食莧菜，所以就係咁種，符合番自己口味，但咁大塊地都唔會全部種莧菜嘅，佢都有種吓菠蘿。莫非又係要符合番佢老婆嘅口味，先至選擇種菠蘿？
卓妮