中環出更：青年創意天馬行空 洪文正話想像可成真
半島東扶輪社創社社長洪文正（Alex）日前去到數碼港，為第十一屆全國青少年科學影像節（香港區選拔賽）擔任評審工作。佢話是次比賽係旨在鼓勵青少年學習同使用網絡與多媒體技術，參賽同學需將科學探究嘅方法與過程，製作成四分鐘嘅動畫或八分鐘嘅微電影。Alex話唔好以為青少年嘅科普創意天馬行空就必定係不切實際，佢回想童年時所睇嘅叮噹（多啦A夢）卡通片裏面出現嘅法寶，今日有六至七成已經成為事實。
Alex仲好記得，叮噹有一件名為「翻譯蒟蒻」嘅法寶，吞下之後就可以同不同語言嘅人溝通，以前睇落會覺得無可能發生，但其實今日嘅翻譯科技已經好接近當日嘅故事情節。至於能夠提升人類負重力量嘅外骨骼技術以及網絡有售嘅寫字機械人，簡直係將叮噹故事搬上應用層面。Alex話一啲看似天方夜譚嘅想像，往往會開啟探索科學研究之路。
陳家豪：港學生科普創意有賴老師指導
另一位評審，香港新興科技教育協會副會長陳家豪（Emil），就指一個社會嘅科普創意，同流行文化大有關係。佢話童年睇過一套名為「雷鳥」嘅科幻木偶劇，其滿布儀器嘅畫面令佢覺得若能運用科技者，必屬社會精英，從而啟發佢後來從事科技行業。Emil話當今嘅科技強國，都好注重提倡科普嘅流行文化。香港喺呢方面唔係冇，不過製作嘅手法就較為落伍同欠缺趣味，令本地學生嘅科普創意相當仰賴老師指導。
亞太青年創業家協會聯席主席黃浩正（Melon）就已經為呢個賽事擔任過兩屆評審工作。佢認為相較於自己嘅求學時代，今日嘅學生有更多接觸科普嘅渠道。Melon相信未來社會必然係到處都講求科技應用嘅世界，今日嘅青少年嘅科普知識若果夠紮實，他日投身職場會較為有利。
卓妮