政情：公民講場：郵購系統唔掂照開售 郵政甩轆 市民氣谷

網上購物平台未必每個都可靠，香港郵政嘅「郵購網」就係一例。尋日香港郵政發售日本經典漫畫「多啦A夢」郵票，好多集郵愛好者一大清早就嘗試透過郵購網購買，誰知系統死機無法交易。香港郵政亦都承認，因系統處理大量交易，以致出現緩慢情況，當系統回復正常，郵票亦已售罄，唔少人願望落空、大感失望。其實喜歡日本動漫嘅收藏家為數甚眾，今次郵票發售反應熱烈實在可以預期，香港郵政事前竟然唔做好系統調校，導致大批集郵愛好者向隅，郵政署署長朱曼鈴點樣交代好呢？