中環出更：疫下父親節冇得遊埠 沈運龍：一家食餐飯都開心
嚟緊又到父親節，到底當日要點樣同爸爸慶祝，唔少人都會費煞思量。香港珠寶製造業廠商會榮譽主席沈運龍（Aaron）過往都會選擇去外國旅行，一家人去玩吓潛水，不過依家因為疫情，一早就打消出外遊埠呢個念頭，到時可能只係得夜晚食吓飯就算喇！
Aaron話囝囝喺外國讀書，礙於疫情而冇返香港，所以今年父親節就冇得一齊過喇，不過好彩仲有阿女喺香港。講起本港嘅經濟，就因疫情而受挫，Aaron話本身做開嘅外國出口生意都停頓晒，但亦都因為咁而多咗時間去搞本地生意，最近就籌備緊鑽石藝術博物館，估計父親節當日都會好忙，所以打算夜晚同屋企人食飯。佢仲話，其實以乜嘢形式慶祝父親節都冇所謂，最緊要都係一家人開開心心。
彭志宏估今年會收到畫
九龍樂善堂副主席彭志宏（Peter）都同Aaron一樣，打算同家人一齊食飯慶祝。作為兒女好多時都會預備禮物送畀父母，Peter就話自己童年時好少會準備禮物送畀爸爸，反而喺母親節就會準備一紮花畀媽媽。究竟爸爸會唔會因為咁而呷醋呢？Peter就話佢唔會呷醋，仲話喺一個家庭入面，爸爸同媽媽所扮演嘅角色都唔同，不過兩者嘅共同願望都係想兒女健康快樂咁成長。至於今年會收到仔女送乜嘢禮物？佢就話唔知，不過估可能係一幅畫，事關兒女年紀仲細喎。
另外，卓妮早排喺中環撞到「九巴金公主」伍穎梅嘅男友許晉平，見佢獨自喺歷山大廈行去置地，有時仲喺商場行多兩圈添。到底佢去緊邊度？佢就話出嚟行吓當運動，至於父親節點慶祝？佢話依家邊度都去唔到，都係留喺香港，一家人開開心心食吓飯喇！
卓妮