繼早前政府刊登招聘廣告，以年薪約一百四十萬元及三十六萬元，分別為公務員事務局和財經事務及庫務局，聘請高級經理及項目主任後，近日再為財政司司長私人辦公室招聘高級研究員，話專責研究經濟發展，年薪分分鐘高達約九十四萬元。事實上，最近政府喺面對美國制裁、經濟不景嘅情況下，仲掟幾百億救海洋公園同國泰航空，經濟搞到一鑊粥，高薪請個人返嚟又係咪真係救到經濟呀？
招聘廣告列明聘請高級研究員，月薪介乎六萬四千至七萬八千元，計吓條數，一年最少有近七十七萬元落袋，如果經驗豐富嘅話，年薪可高達約九十四萬元。有關職位要具備最少八年媒體、新聞、公共關係及公共事務全職工作經驗，主要負責監督、策劃並進行香港、內地和國際經濟發展嘅專題研究同分析，仲要進行民意分析及監測等。
今年新冠肺炎疫情蔓延，對本港經濟已經帶嚟沉重打擊，最近仲要面對美國制裁香港嘅問題，但係政府仍然無視呢啲問題嘅嚴重性，先後向海洋公園以及國泰撥出巨款救亡，依家用高薪請人返嚟救經濟，如果研究吓就可以救到經濟，咁政府都唔使枉花幾百億元，請多幾十個研究員就得喇。
卓妮