中環出更：孫蔡吐媚留家抗疫 愛上種植
新冠肺炎疫情持續，經濟受到嚴重影響，再加埋唔少地方都封關，好多人即使壓力好大都冇得去旅行抖吓氣。既然冇得去旅行，早前直頭要在家工作，仁濟醫院董事局副主席孫蔡吐媚（Mary）就話趁住疫情，開始會打理吓佢嘅花園，會種吓樹同埋花，仲話覺得好好玩添！
除咗種吓花花草草，Mary就話因為疫情而多咗留喺屋企，本身有四個仔女嘅佢，就趁呢段時間多咗同仔女傾偈，仲無所不談乜都傾添。雖然仔女平日星期一至五要返工，不過一到周末呢啲家庭日，佢仲因為疫情而多咗機會同仔女食飯，增進下感情。對Mary嚟講，屋企就係最緊要嘅嘢喇！
唔少人因為疫情而要在家工作，不過本身香港人好多時都要超時工作，甚至要將工作帶返屋企做。中華廠商聯合會副會長吳清煥就話絕對唔會將公司嘅嘢帶返屋企，認為屋企係用嚟好好休息嘅安樂窩！佢話最近工作無咁忙，反而可以有多啲時間陪吓屋企人。好彩佢太太都喺同一間公司做嘢，所以都好明白佢工作上嘅壓力，再加埋大家都有共識，唔會將工作帶返屋企，所以兩公婆放假就真係輕鬆吓，出街玩。
王偉雄夫婦 睇仔女相減壓
呢排因為疫情，善德基金總理王陳鴛鴦嘅大仔王偉雄同媳婦韓沂彤都話一家人見面嘅時間多咗，仲多咗喺屋企食飯添。而最近佢哋嘅囡囡都出咗世，依家成三個月大，加埋四歲大嘅囝囝湊成一個好字，韓沂彤仲話平日對住一對仔女，就係佢最開心嘅時光。兩公婆嘅手機同埋電腦都會有仔女嘅相片，每逢做嘢辛苦，或者掛住仔女嗰陣都會睇吓佢哋嘅相，仲話一見到就成個人都甜晒。
卓妮