政情：核酸檢測貴澳門11倍 陳健波籲港府諗計減價
近日香港肺炎疫情似乎有所緩和，政府計劃放寬出入境限制，有話打算透過發出健康碼同認可核酸檢測，容許粵港澳三地必要人員往來。但係立法會保險界議員陳健波（波哥）就喺社交網站貼文，佢計過條數，發現香港核酸檢測費用比起澳門最多貴十一倍，話政府應該搞搞佢啦！
基層中港家庭難負擔
之前已有政黨同食物及衞生局局長陳肇始就健康碼嘅安排表達意見，波哥同意推出香港「健康碼」可以幫助恢復三地交流，又指澳門核酸檢測只要一百八十蚊，但香港檢測費用要大約九百至二千蚊，好多中港家庭同低收入人士負擔唔到。
波哥仲話收到好多從事跨境工作同做生意嘅市民反映，因為封關措施做唔到生意，經濟出現困難，有啲人甚至負擔唔到租金要瞓街。佢期望政府盡快公布放寬檢疫嘅實施日期同細節，同時諗吓點樣減低檢測費用。
之前內地要求香港跨境貨車司機做核酸檢測都發生咗場風波，業界不滿收入已大減，仲要畀咁貴嘅檢測費。最後政府「跪低」，內地喺口岸為香港跨境司機做檢測，政府就承擔三百五十蚊嘅檢測費。唔知今次港府聽到波哥咁講，會唔會補貼檢測費用畀市民呢？