政情：智慧燈柱爆爭議 薛永恒死撐計劃不變
政府推出多功能智慧燈柱惹起唔少爭議，早前喺觀塘區議會亦有唔少區議員質疑添！如果區議會立場同政府唔同，政府又會唔會尊重呢？創新及科技局局長薛永恒尋日喺立法會一個事務委員會上話，智慧燈柱係重要基建系統，會睇番香港整體利益，每個區議會可以對唔同事務有唔同意見，但唔會改變政府為香港推動整體嘅創科利益，同時又話一定會聽市民整體嘅聲音，令市民理解燈柱嘅設計。
唔少議員喺資訊科技及廣播事務委員會上追問關於智慧燈柱，有議員直斥依家市民對政府嘅信任極度不足，所以任何錄像設備都會嚇親市民，甚至話市民寧願返去石器時代都唔想被政府監察，亦有議員質疑係咪區議會反對都要繼續做。
稱會向市民釋疑
有份出席區議會會議嘅資訊科技總監林偉喬就話，雖然區議會冇表示支持，但普遍認同香港需要發展創科，仲同意要向區內居民解釋智慧燈柱以釋疑慮，預算喺第三季安排公眾展覽，介紹燈柱嘅裝置同應用。
對於唔少人擔心智慧燈柱所收集到個人資料會唔會被送到其他地方，薛永恒話明白市民憂慮，又話燈柱所收集嘅資料只作本地用途，係提供搜集環境數據等功能，同個人私隱冇太直接關係。