政情：收回教育電視中心 理所當然 建制斥泛民為港台出頭
教育局早排宣布收回香港電台教育電視中心惹爭議，有民主派議員要求立法會資訊科技及廣播事務委員會召開特別會議，但民建聯黃定光（象哥）就質疑點解有議員會咁重視，連用邊度都要代為出頭？不過，最終事務委員會主席莫乃光都冇決定開唔開特別會，話要同政府傾吓先。
有民主派議員早前去信事務委員會，要求另設議程討論事件，尋日仲喺事務委員會會議上要求討論。該名議員認為事件爭議性極高，當中仲牽涉運作同埋管治問題，又同公帑有關連，所以希望可以召開特別會議處理。
節目製作偏頗
但唔少建制派反對，其中象哥唔止質疑民主派代出頭，仲話港台唔係「今日撤、聽日就要佢搬」，有大半年時間，甚至質疑喺時限屆滿時都未搬走係咪屬霸佔官地？
而事務委員會副主席葛珮帆就鬧爆港台節目製作偏頗，質疑係咪符合《香港電台約章》，仲認為政府已經多次探討教育電視大樓嘅問題，認為回收屬於理所當然，唔應該浪費資源。