政情：狂食民主派檸檬 徐英偉破冰落空

議案曾被指超越職能

十七位油尖旺區議員早前喺大會提出「重組警隊，停止濫暴」議案，而當區民政專員余健強喺會上話有關議案已超越區議會職能，秘書處未能提供支援，政府人員亦未能出席，隨即「拉隊」離場，而官方會議錄音同記錄都唔會記載相關議程討論。

林兆彬回應查詢時話余健強涉行政失當、不按《區議會條例》行事，同埋不按區議會以往做法行事，大鬧余嘅做法好「離譜」。佢早前已向廉政公署投訴余涉公職人員行為失當，同埋向申訴專員公署投訴余涉行政失當。公署喺月初回函話會受理調查，事後會提供調查報告。林預料結果唔樂觀，話公署最多對余予以譴責或感到遺憾，但冇方法處罰余，所以佢下一步或提出司法覆核，但仲未搵到適當人選代為申請法律援助。

「正式約見 信都冇封」

其實，政府同區議會嘅關係已近「冰點」，徐英偉早前話要搵各區議會對話，試圖「破冰」。但點知民主派就請佢「食檸檬」，話唔見住喎。葵青區議會主席單仲偕就話雙方見面嘅主動權喺徐英偉手上，又呻「局長又話正式約見，結果信都冇封」，如果徐依家開始約見區議會，估計約得嚟都下個月先可以見面啦！

雙方關係有幾差？單仲偕形容區議會同政府嘅關係唔單止係「冰點」，仲係「劍拔弩張」添，又話根據慣例，各區民政專員會同新任區議員影大合照，但依家連呢啲「表面嘢」都做唔到，都體現到雙方關係唔好啦！至於見到局長有乜嘢要傾？佢話政府最少都要解釋吓，點解拎幾百億元抗疫，但就要削減區議會千幾萬港元撥款，仲好不滿咁話「你(徐英偉)都要嚟溝通o架」，但對會面唔會有好大期望喎。

到底係局長唔願意傾，定係民主派唔想見呢？離島區議會主席余漢坤就話上個月已經見過徐英偉啦，徐當日都有約見民主派區議員，只不過民主派唔畀面，冇人出席咁解。睇嚟徐英偉都要再諗吓辦法，去化解僵局嘞！