中環出更：怕再掟臭蟲臭彈 立會禁議員鎖儲物櫃
立法會喺上兩次大會審議《國歌條例草案》期間，先後有民主派議員許智峯同陳志全喺會議廳內掟「臭彈」同「臭蟲」，令會議暫停數小時，立法會行政管理委員會主席梁君彥尋日決定，由今日起會議廳內嘅議員座位之儲物櫃將唔可以上鎖，以便日後秘書處不時喺會議廳進行清潔同安全檢查。
方便清潔安檢
秘書處文件指出，喺五月二十八日同上周四，立法會綜合大樓會議廳同會議室分別發生有議員投擲惡臭物體或液體嘅事件。至上周五，一個議員座位嘅儲物櫃內發現惡臭液體，鑑於屢次發生同類事件，並按梁君彥指示，秘書處將會為包括議員座位儲物櫃在內嘅會議廳範圍內進行徹底清潔同安全檢查。
為方便進行清潔同安全檢查，議員須於今日上午十時至中午十二時期間將會議廳座位儲物櫃內嘅個人物品移走。議員或其職員喺攞走個人物品後要將儲物櫃保持開啟，而秘書處職員同清潔承辦商會喺當日下午進行清潔同安全檢查，並會喺過程中開啟任何被鎖上嘅議員儲物櫃。
卓妮