中環出更：溝通好過出藤條 蕭楚基：同兩個仔無所不談
俗語有話嚴父出孝子，咁係咪吓吓都要打先可以教導小孩？其實多啲同小朋友溝通，效果畀出藤條可能會更好。前排同綠色環保互助委員會主席蕭楚基傾開呢個話題，佢話同兩個仔無所不談o架！
蕭楚基話喺兩個仔細嘅時候，雖然自己工作好忙，但放假嘅時候會全部時間畀晒屋企，會帶佢哋去游水，出去玩吓，多啲時間同佢哋溝通，喺生活上會畀佢哋自由發揮，等佢哋可以「開竅」，其後兩個仔轉到外國繼續升學，自己一有時間都會飛過去探佢哋。佢仲話即使兩個仔依家幫屋企打理生意，佢哋周不時都會坐埋一齊，傾吓公事，天南地北乜都講，佢仲話同小朋友養成溝通習慣好重要，多啲聽吓佢哋嘅意見，解釋吓事件對錯，效果會畀體罰好好多。
簡陳擷霞：愈緊張愈吸收唔到
日前卓妮去咗博愛醫院醫療車啟動禮，博愛主席簡陳擷霞話發覺教小朋友唔可以太過強迫。點解？佢話自己有一對仔女，喺禮貌同規矩上管教比較嚴，囡囡喺學習上比較慢，所以自己試過工都唔返專注教佢，無奈你愈緊張，佢就愈吸收唔到，所以換轉一個方式放鬆教學，等佢自發性發揮小宇宙，反而成績出奇地好，依家就算啲孫，佢都用呢個方式同佢哋相處，感情仲愈嚟愈好添！
博愛副主席李柏成就話細個家教好嚴，做錯嘢真係會打，但年代唔同，依家要正面同小朋友解釋啱與錯，因為依家資訊發達，小朋友好容易喺唔同途徑得到訊息，要嘗試企係佢哋嘅角度，從而了解到佢哋嘅內心世界，教導佢哋有正面嘅人生觀。
卓妮