新冠肺炎疫情未過，正當各界諗緊計仔，點樣一齊共度時艱，房屋委員會（房委會）就反其道而行，打算喺今年九月上調公屋租金達百分之九。坐擁過百億元盈餘嘅房委會，今次唔單止係十年內第五度加租，仲要喺今時今日市道不景嘅情況下，不但冇凍租或減租，反而疫市加租，真係離晒大譜。雖然房委會藉詞話加租只不過係按機制辦事，但係咁做就未免太過僵化囉！房委會主席、運輸及房屋局局長陳帆嘅薪俸都係來自納稅人，係咪都應該企喺市民大眾嘅角度嚟設想公屋嘅租金水平呢？
