政情：麥美娟執二攤 獲提名任中大校董
立法會內務委員會日前選出中文大學及香港大學校董會成員中嘅議員代表，議員麥美娟（Alice）係獲提名加入中大校董會嘅其中一位，中大英文系畢業嘅Alice事後就話，自己係代替早前獲委任為勞工及福利局副局長嘅前議員何啟明出任校董，佢話自己對學校並唔陌生，希望可以為母校出一分力咁話。
Alice喺Facebook開直播時，提到大學校董一啲都唔容易做，有朋友仲形容大學就係戰場，加上社會嘅激烈氣氛都可能衍生好多問題。問番Alice以前同新一代嘅學生有啲咩分別時，佢就分享話，自己喺中大讀書時，會與同學一齊推動課程檢討，喺每個學期尾時完成問卷調查，畀學校知道啲學生對老師嘅教學表現有咩評價、建議等，大家都好心平氣和同校方討論，但依家嘅學生同校方會面嗰陣，大多數會成班人包圍校方職員，情況都幾令人擔心。
指校園問題政治化催生衝突
反修例事件由舊年六月爆發至今仍未平息，亦有唔少大學生參與，中大舊年十一月更淪為戰場，Alice認為校園問題政治化係衝突發生嘅原因之一，但不能一概而論話所有大學生都係滋事分子，因為佢認識有部分嘅大學生都唔贊成用暴力解決問題，Alice期望學生可以理性分析社會事件，並呼籲唔好參與違法活動。