政情：即興表決臨時動議 17區會聯合大會險內訌
由民主派揸莊嘅十七區區議會尋日舉行聯合特別大會差啲爆發內訌，場面一度混亂，好彩最後「一個願打一個願捱」，最後有人「耍冧」認衰冇做好溝通工作，先至冇出現割席咋，究竟發生咩事要咁忍辱負重啊？
先斬後奏 「焗住支持」
話說聯合大會原定議程只討論撤回「港版國安法」立法，但屯門區議員張可森喺每區逐一表決環節突然「先斬後奏」加插臨時動議，要求設立香港公民議政平台，仲要十七區即時表決添，搞到事前唔知悉嘅港島九龍近半區議會晒頭，於是灣仔區議會主席、主持會議嘅輪任召集人楊雪盈就提議休會討論，觀塘區議會主席蔡澤鴻都話未睇過動議需要時間傾吓。惟張好激動反對，又同鄰坐區議會起哄大叫「投票」，期間北區區議會更一度離席，直到表決前都冇入返場內。事後仲聽到有區議會主席私下投訴，指「焗住支持咁」。
動議最終獲通過，十七區區議會主席事後解畫指，北區離席前已通過臨時動議，強調佢哋態度一致。問到會否感到不被尊重時，佢哋就否認並解釋係溝通誤會，仲話事件示範咗心中嘅民主喎。究竟喺民主示範定霸王硬上弓，相信公眾自有定論。