政情：反對派臭水攻立會 陳克勤爆仲有兩共犯
惡臭突襲立法會會議廳嘅事件餘波未了。建制派議員陳克勤前日喺社交平台拍片，話除咗議員陳志全、朱凱廸、許智峯（峯鴿）三位反對派議員外，佢相信仲有兩個「共犯」牽涉其中。雖然並無指名道姓，但依據佢嘅描述，嫌疑人嘅身份都算係呼之欲出喇。
話一個孭背囊 一個似豬肉佬
陳克勤指反對派今次搗亂，明顯較峯鴿上個禮拜掟「臭彈」更有計劃同更有準備，佢話當涉事議員被逐，梁君彥隨即宣布休會。「共犯一號」於事發後企圖藉議員身份重返會議廳，話要拎番自己啲野，結果立會保安以警方搜集證據為由，一口回絕。佢懷疑對方係有一樽臭水收埋喺背囊入面。佢話警方應該將「共犯一號」成日孭住嘅背囊帶返警署，當作證物處理。
咁「共犯二號」又係邊個呢？陳克勤話大家最近都叫佢做「豬肉佬」。話說當日晏晝復會後，峯鴿喺一號會議室將臭水潑到周圍都係，而「豬肉佬」其實就係峯鴿嘅「後備」，將另一樽臭水放喺自己座位櫃桶底備用。但表決完畢後，「豬肉佬」好快收工走人，樽臭水就留低咗喺個位度，結果翌日開會嘅時候，保安員發現臭水，搞到一眾議員要喺二號會議室開會。
到底邊位議員成日孭背囊，邊位又最似豬肉佬呢？儘管有唔少網民留言推斷兩位共犯嘅身份，不過陳克勤始終三緘其口，並無透露答案。