政情：推電動車懶回收廚餘慢環保署加開短期職位補鑊

政府多年嚟致力減廢都未能達標，特別係推動電動車及減少廚餘方面，成績都令人搖頭。環境保護署（環保署）日前就刊登多個招聘啟事，而當中就包括加開電動車及減廢廚餘兩個短期職位，唔通係想為政策甩漏補鑊？

之前有數據顯示，一七年本港每日棄置嘅廚餘重量大約係三千六百幾公噸，等於二百五十架雙層巴士嘅總重量！但事實上政府收集到嘅廚餘完全唔達標，喺一九至二○年度有機資源回收中心第一期，只係收集到大約三萬公噸嘅廚餘，同政府當初承諾嘅每年可以收集嘅七點三萬公噸少成一半咁多。

除咗廚餘方面做得唔好，推廣電動車亦差強人意，得百分之三點三嘅政府車輛係電動車，加上電動車公共充電設施不足、停車場泊位管理不善等，政府電動車政策又一時一樣，令市民無所適從。