政情：何啟明唔熟書 避上立會驚瘀

羅致光：下屆才讓何回應質詢

羅致光出席電台節目期間，被問到新任副局長何啟明表現如何。羅就話，何係擔任副局長嘅首選，不過就認為對方需要一段時間適應新工作，同埋掌握政策範疇，亦需要時間去適應由議員變為官員，初步無打算畀對方喺未來一、兩個月到立法會回應質詢，可能要等到立法會換屆之後先會安排喎。

羅仲話，當佢要揀選副局長時，腦海中第一個想起嘅人就係何啟明，絕對唔係喺工聯會抽籤咁，隨便抽一個人去擔任副局長，重申佢作為問責官員係睇表現，認為何對問題掌握及表達，都有一定程度認識，個人判斷覺得何係合適人選。佢又話，何啱啱轉變議員身份，工作上要適應掌握，預算需要一段時間作為學習期，再去討論分工問題，話好難今日就評論對方表現。

履新日遇英語提問 騰騰震

事實上，政府公布何啟明為勞福局副局長當日，隨即引起唔少人嘅質疑，擔心佢嘅能力，包括英語能力等，未必能夠勝任有關工作。直到履新當日接受傳媒訪問，遇到英語提問時，何唔單止要睇「貓紙」，仲要羅致光「護短」幫手回答問題，唔知局長係咪擔心副局長冇辦法獨自應付尖銳嘅問題，所以要收埋佢？定還是IQ高嘅羅致光，已經預想到何副局長力有不逮，暫時唔畀佢出嚟住？

其實以往啲新官上任，都會喺頭幾日就落立法會，加上何啟明議員出身，加入「熱廚房」成為問責官員後理應更快上手，但點知就匿埋唔見人，仲要立會換屆後，即係九月先至會去立法會回應質詢喎，唔通係趁呢段時間惡補英文同勞福政策，以免再次出醜？