中環出更：陳志全私人檢控郭偉強襲擊獲批
立法會議員陳志全（慢必）就上月初發生嘅內務委員會（內會）衝突，提出私人檢控議員郭偉強普通襲擊，慢必尋日就喺社交網站話，接獲法庭電話通知，已發出佢對郭偉強私人檢控嘅傳票，稍後會去法院領取。
內會衝突 拉跌拖行致傷
內會上月八日會議期間爆發主席選舉風波，慢必喺衝突間遭郭偉強拉跌，並在地上短暫拖行受傷，慢必事後報警處理，但事隔兩星期後，佢就話警方仍未採取相應行動，於是喺上月廿五日到東區裁判法院，以私人檢控方式起訴郭，控告對方普通襲擊。
慢必事後亦都有話，當日嘅事發經過已被拍下，係鐵證如山、無從抵賴，亦已將相關片段交咗畀法庭。至於訟費方面，早前就以眾籌方式籌得過百萬港元，並已將款項交到律師樓。佢又認為律政司應該起訴郭偉強，而唔係由民間籌錢控告，佢覺得公眾都想睇到律政司下一步會點樣做。而郭偉強就指案件已交由律師處理，佢暫時唔會回應。
卓妮