中環出更：珍藏貝殼 何順文：千金難買心頭好
每個人都有自己嘅心頭好，有人會千方百計，走遍世界各地去搜羅心頭好收藏，珠寶玉石、名錶名車，甚至飛機大炮嘅收藏家都大有人在，有人會話呢啲係有錢佬嘅玩意，但香港恒生大學校長何順文教授就話，自己都有收藏貝殼嘅習慣，佢話收藏品嘅價值，唔應該以金錢去衡量，正所謂千金難買心頭好嘛。
話說尋日有間佛教藝術珍寶館搞咗個開幕禮，館內收藏咗好多年代久遠嘅佛教雕刻品供大眾免費欣賞，有份出席活動嘅何校長話自己好鍾意大海，就算旅行都會去當地嘅沙灘行吓，有次行過海邊偶然見到個貝殼好合眼緣，就係咁就開始咗佢收集貝殼嘅興趣，時至今日屋企已經有過百個貝殼，閒時會攞啲寶貝出嚟望吓，旅行嘅開心回憶即時返晒嚟，所以何校長話收藏品嘅意義，往往大於佢嘅金錢價值。
盧瑞珊搜購古佛 盼保存文化
活動主辦機構，法住機構會長盧瑞珊，話佢哋一直秉持「讓一切有價值的文化永住於世」為宗旨，早前搜羅一批古代木雕佛像捐畀紀念館，目的係希望呢類古代工藝可以永遠保存落去。講起收藏品，佢話最喜歡就係一個觀音菩薩像，話一見到就覺得同佢好有緣分，仲話若然咁唔好彩屋企火燭，最緊要抱住個觀音像逃生就得喇，其他嘢都可以唔要喎。
獲邀出席嘅嘉賓仲有前民政事務局長藍鴻震（藍爺），藍爺話自己雖然係天主教徒，但對其他宗教都抱尊重嘅態度，認為大家都係講道理，所以不同宗教活動都有邀請佢出席，而藍爺就喜歡收藏唔同嘅石頭，當然翡翠玉石都係石頭嘅一種，屋企有個櫃放咗百多件心頭好。咁屋企咪要做足防盜措施？藍爺話自己唔係玉石專家，唔會買一啲好貴嘅玉石，所以唔使擔心喎。
卓妮