政情：陳健波拍片揭穿金融謠言
網絡消息紛陳，往往真假難辨。立法會財務委員會主席陳健波（波哥）尋日喺社交平台拍片，澄清幾個近期最可能出現嘅傳言，分別係指香港將會實施外匯管制、港元兌美元大幅貶值、股市同匯市會被沽空，其實呢三個金融消息都係假嘅！佢提醒大家要查證之餘，仲要密切留意政府、金融管理局嘅官方網站同社交平台。
斥攬炒派推港落深淵
波哥話根據《基本法》所列條文，香港絕對唔會有外匯管制，以保障資金自由出入。因香港坐擁四千四百億美元外匯儲備，連同二千二百億美元貨幣基礎，就算收番晒所有港元，都仲有二千二百億美元揸手，叫市民唔使太擔心。咁究竟股市匯市會否被沽空踩冧呢？波哥解釋，近年國際監管機構要求金融機構沽空活動必須具透明度，亦多咗好多申報披露要求，所以聯交所、金管局同證監會都好清楚沽空活動同港元借貸活動嘅情況，亦會及早掌握情況同採取措施應對。波哥又話唔少金融大鱷搵食較過往艱難，預料大家會收到好多假消息，因此會要求政府，特別係金管局留意，迅速澄清謠言。對於「攬炒派議員」呢一、兩年經常「搞搞震」，要求美國制裁香港，波哥話最大、最直接受害人就係港人，反問究竟攬炒派係想為港人爭取更好生活，定係推向動盪苦難深淵，相信好多市民都有目共睹。