中環出更：教材小組未選出主席 張國鈞「剪布」失敗
本港學生嘅教科書內容爭議不斷，近年經常被批含政治導向嘅意味，立法會教育事務委員會早前成立小組委員會，研究幼稚園、中小學教科書及教材編製，惟開咗兩次會都未選到主席。議員張國鈞去信委員會主席葉劉淑儀，建議召開特別會議處理相關工作。之但係，民主派議員就反對建議，認為呢項工作唔算急，有其他教育事務更急喎。佢哋又質疑信件唔係動議，唔可以提出表決，而建議最終亦喺一片喧嘩聲中以十二票贊成、十二票反對遭否決。
轟梁耀忠主持一塌糊塗
話說張國鈞喺信入面講到，教材小組喺年初成立至今仲未選到主席，張狠批小組主持人梁耀忠主持選主席嘅表現一塌糊塗，又斥梁講到明唔會有選主席時間表，認為咁樣拖落去，小組唔能夠喺下月中本屆議會完結前開展實質工作，故建議委員會召開特別會議研究教科書。
面對呢個剪布方案，班民主派議員梗係舉手舉腳反對喇，又話開特別會議多餘、又話做法有違程序公義咁，於是葉劉就提出個拆衷方案，叫大家就建議表決，但又遭民主派反對，搞到葉劉都忍唔住寸佢哋，「民主派希望民主，但我依家用民主方法處理就畀人批評」。
卓妮