中環出更：助建中港網絡 葉中賢教初創企業搵工總
根據投資推廣署去年報告，香港有大約三千二百間初創企業，按年上升兩成，亦代表本地有一萬三千個就業機會。香港初創企業協會副主席陳允誠（Bryant）日前喺該會嘅一個活動上話，就算依家面對唔少挑戰，但仍然有好多創業者尋求成立初創企業嘅機會。香港工業總會（工總）主席葉中賢（Daniel）教路，初創企業可以向工總取經，因為佢哋係一個尋求工業夥伴嘅好地方。
Daniel解釋由於工總裏面有好多發展成熟嘅生產商，呢啲生產商嘅生產線設立喺華南地區，初創企業可以透過喺中港之間嘅完善網絡保持緊密接觸，同時能夠透過香港獨特嘅法律制度、知識產權嚟籌集資金。Daniel話透過呢啲模式嘅合作助加快初創企業生意增長嘅速度。
香港初創企業協會主席趙子翹（Jason）話，雖然新冠肺炎疫情可能會持續一段時間，亦會改變人類生活習慣，但佢認為唔會造成長期影響，又話初創企業如果要喺疫情後期繼續生存、甚至比其他人優勝，必須具備非常好嘅適應能力，佢又舉例子，一間專門售賣智能眼鏡同手錶嘅公司，本來喺網絡銷售產品畀消費者，後來改變營商策略，直接喺互聯網同企業進行買賣，今年二月賺取大約一千八百萬美元。
湛家揚鼓勵進軍東南亞
第三屆「初創企業指導計劃」首席導師湛家揚（Toa）認為，所有初創企業要諗吓點樣擴大市場，除咗內地，Toa話東南亞市場亦相當重要，佢話香港至少有八間「獨角獸」企業，當中大部分已經喺東南亞市場發展得好成功，所以佢就鼓勵有意成立初創企業嘅企業家，搵一啲合作夥伴進軍東南亞市場。
卓妮