政情：立會會期將盡 專營的士草案難產

審議需下屆重新開始

由於草案未能喺今個會期內通過，將會失效，審議工作要喺下屆立法會重新開始。議員盧偉國認為既然委員會難以於今屆會期完結前完成工作，不如盡快話畀政府知，讓政府處理其他議案。另一議員譚文豪就提出加開會議，或者問吓政府能唔能夠將條例草案排喺較前位置審理。

條例草案委員會主席張宇人就話冇足夠嘅會議時間畀委員會開會，唔認為委員會能夠喺七月三日前完成審議工作。最後委員會以七票贊成，譚文豪一票反對下，通過停止委員會工作。

政府早喺一五年十一月已就推出專營的士嘅建議，諮詢立法會交通事務委員會，當局計劃批出專營權，讓承辦商推出唔多於六百輛可供網約嘅專營的士，政府將規定的士嘅車輛類型同車廂設施等，建議起錶收費三十六蚊，較現有的士貴近五成。