政情：再現本地感染個案 陳肇始難辭其咎
繼本月初出現「梨木樹群組」個案後，本港尋日再出現未知源頭嘅本地感染個案。其實過去幾個月，多名專家都提醒政府要做好社區病毒檢測工作，搵出社區冇病徵嘅隱形病人，切斷隱性傳播鏈。之不過，政府一直冇聽從專家建議，又冇推動社區檢測，如今再次有市民染疫，作為食物及衞生局局長嘅陳肇始真係難辭其咎！
無聽勸告找出隱形病人
香港大學微生物學系講座教授袁國勇話，最近相繼有本地感染個案出現，反映社區仲有隱性傳播鏈，批評本港檢測數目不足，導致搵唔出新確診者嘅感染源頭，仲話本港每日應該喺十八區進行七千次病毒測試。
而港大感染及傳染病中心總監何栢良都早喺「梨木樹群組」出現前講過，本港確診個案有超過四分之一係冇病徵感染，批評政府對呢類個案視而不見，促請當局做好社區病毒檢測。
但政府過去嘅態度就好似「過咗海就係神仙」，好似覺得只有零星個案就唔認真處理，依家又出現未知源頭嘅本地感染個案，搞到市民大眾人心惶惶，未來要繼續活喺疫情陰霾下，陳肇始真係難辭其咎！