政情：峯鴿變身「許至瘋」 似鬥牛亂衝
立法會日前開會審議《國歌條例草案》期間，民主黨（白鴿黨）議員許智峯（峯鴿）抱住一袋腐爛嘅植物，突然衝到主席台前抗議，議事廳隨即充斥陣陣惡臭，更有議員不適送院。議員張國鈞（Horace）就形容，峯鴿嘅行為同西班牙國技中嘅鬥牛冇乜分別，又大數對方過往嘅瘋狂表現，直指佢係「許至瘋」。
民主派被指係腐爛根源
Horace形容，峯鴿嘅行為令佢諗起自己去西班牙旅行嘅經歷，提到西班牙鬥牛場中嘅鬥牛「好容易發嬲，好容易發狂，亂衝亂撞」，覺得峯鴿喺立法會嘅表現同鬥牛冇乜分別。Horace仲話，自己同佢曾經喺中西區區議會共事，見過峯鴿開會期間用大聲公阻住其他人發言，又試過衝出去搶主席嘅咪同文件，喺立法會又搶人手機，形容佢係「許至瘋」。
Horace又引述許當日指，「希望建制派感受到腐爛嘅滋味，從而影射腐爛嘅制度、一國兩制同埋法治」，但Horace就覺得民主派過去幾年嘅表現，先係呢個腐爛嘅根源咁話喎！