政情：人力委員會重選主席 朱凱廸勢遭封殺
政府尋日公布委任工聯會勞工界議員何啟明出任勞工及福利局副局長，佢即日辭去議員一職，副局職位將會喺聽日履新，但佢原本身兼人力事務委員會主席，佢一走，變相委員會即刻冇咗個主席，要點開會呢？加上委員會副主席係民主派議員朱凱廸，相信都會用盡方法阻礙會議。同屬工聯會議員、又係委員會委員嘅黃國健（KK）就話點都會重選主席，但就唔會係朱凱廸做主席喎。睇嚟建制派係要封殺朱凱廸嘞！
何啟明加入政府消息一出，朱凱廸就喺Facebook發文話，自己係咪直升人力事務委員會主席？都唔知佢係明知故問抑或講反話呢？其實睇番會議議程，人力事務委員會只剩下一次會議，即係六月十六日，當日議程係討論舊年香港職業安全狀況，同埋檢討加強保障政府服務承辦商非技術僱員措施。
問番KK依家個會冇咗主席點處理？佢就話就算得番一次會，都必定會重選主席，因為仲有唔少勞工事務要跟進。至於主席人選會係邊個？佢話真係要開會傾過先決定到，但就唔會係朱凱廸囉！但KK都話會按照《議事規則》，由副主席朱凱廸主持會議。
唔怕又拉布 最多玩到七月尾
民主派嘅議員喺主持選舉內務委員會主席不斷拉布，搞到內會停擺逾半年，直至本月中開第十八次會先選到主席出嚟。依家人力事務委員會選主席，唔怕朱凱廸又千方百計阻撓選舉？KK就覺得唔出奇，之前內會都搞咁耐啦，但佢哋要咁都冇辦法，點都要跟規矩，要畀番副主席主持咁話。另外，佢話今屆會期都就嚟完，最多畀佢玩到七月尾，加上比較受關注嘅延長產假草案都已審議完成，影響不大。但建制派真係由得佢拖，唔會有乜嘢計劃阻止？KK就笑話暫時真係冇計劃喎。
朱慣性搞事 建制早睇唔過眼
其實泛民成日拉布，唔單止內會，近日有關研究幼稚園、中小學教材編製小組委員會開咗兩次會都選唔到主席，負責主持選舉嘅民主派議員梁耀忠亦被建制派狠批拉布阻撓，呢啲選主席嘅簡單工作都不停拖，早就令建制派睇唔過眼，不滿浪費議會時間。事實上，建制派對成日喺議事廳玩嘢嘅朱凱廸都好不滿，覺得佢成日搞搞震、無所不用其極，又點會畀佢做人力事務委員會主席吖！