中環出更：行山喘氣 楊大偉吟七言詩追老婆

David真係諗咗條絕橋o架，但唔係氹老婆，係冧老婆先啱。乜嘢絕橋？竟然係吟詩，仲要係七言詩，真係估佢唔到。話說David日前喺Facebook貼文，就係七言詩「假如要再追楊太，可能我未必追到。佢練成凌波微步，我只能食塵落肚。好彩佢人品夠好，願陪我雨中漫步。遊過高山遊過谷，還是覺得你最好。」睇埋張相就一清二楚，太太企喺梯級上邊，而David就喺下邊，David仲話難追，氣咳衫又濕添！其實當日兩公婆行孖崗山，David仲話「咪睇咁有詩意，實情是上氣不接下氣中」。

蕭偉強對夫人要奉行七誡

夫妻之道在乎乜嘢？勞工及福利局前局長蕭偉強（Stephen）最近有得着喎。話說Stephen返嘅教會早前搞咗一個專題，佢被選為範本，訓練另外十對夫婦。佢認為夫妻互動坦誠分享係重要一環，於是佢喺檢討後，就話對住夫人要奉行七誡。係乜嘢？說話慢一點、聆聽多一點、體諒深一點、逞強少一點、讚美慷慨一點、口舌克制一點同認錯誠懇一點。大家估吓蕭偉強做唔做到呢？

鄭明明（左）同陳樹德（右）一齊切蛋糕慶祝結婚四十九周年紀念。

蕭偉強（右）同太太（左）好恩愛，經常放閃。

有「美容教母」之稱嘅鄭明明月初同老公陳樹德慶祝結婚四十九周年紀念，邀請咗班親戚好友出席聚會，由於受到禁聚令限制，親友當時都係分開幾張枱坐。當日鄭明明收到唔少賀禮，而最特別嘅係囡囡親自送上一張支票畀佢買嘢食。佢仲話因為老公唔鍾意應酬，呢段日子兩公婆成日返屋企食飯，人都健康咗好多。咁美容院嘅生意點呢？佢話員工都捱得好辛苦，有人仲要節衣縮食，佢亦體諒員工，勉勵員工要努力同堅持。

卓妮