政情：公民講場：走塑時間表都冇 黃錦星隨時走數

環保潮流興走塑，不過政府除咗多年前實施膠袋徵費外，近年就好少同走塑有關嘅大動作。喺尋日嘅環境事務委員會會議當中，政府話下半年就塑膠飲料容器生產者責任計劃嘅具體方案諮詢公眾，同埋今年年底會完成管制或禁用即棄塑膠餐具嘅可行性研究。當大家都以為走塑政策將有新進展，政府又話未有具體嘅實施時間表喎。其實香港嘅廢膠問題向來都好棘手，譬如膠袋徵費實施初期雖見成效，但近年棄置到堆填區嘅數量又告回升，若果環境局局長黃錦星唔從速為走塑制訂指標或時間表，為香港締造宜人環境嘅承諾就可能要走數啦。