政情：遲遲未撤辣 疑似田北辰家眷沽售豪宅
新冠肺炎疫情影響下，本港經濟低迷，樓市交投都變得淡靜，加上早年以打擊炒賣行為同穩定樓價為目的嘅「樓市辣招」遲遲未有撤減，令樓價下跌嘅壓力與日俱增。或者正好喺呢個基礎上，有消息指，疑有議員家眷近日亦將一幢位於港島高尚住宅區嘅物業放售，並以逾千萬港元沽出。
同期樓盤曾以多百萬元賣出
話說有地產界人士透露，近日疑似係議員田北辰嘅太太同家人，以一千八百八十萬港元沽出港島南貝沙灣六期六座中層嘅一個單位。翻查成交紀錄，發現同期樓盤、且面積較細嘅三座底層單位，竟以高約一百萬港元嘅售價賣出，相較之下，唔知業主沽售嘅價錢算唔算太靚。
莫非係政府企硬唔肯撤辣，加上近日社會氣氛影響，令業主擔心遲啲嘅承接力仲差，於是急急腳沽出？話時話，當初設立「樓市辣招」嘅因素，以依家嘅香港嚟睇，好似都唔適用，如果政府想穩樓價，「撤辣」會否先係比較奏效嘅方法？