政情：鄭若驊老公聯名物業 阿女遭除名
早前長期民望「墊司底」、被嘲為「避政司司長」嘅律政司司長鄭若驊老公潘樂陶與女兒潘穎欣持有嘅一幢物業被揭發有僭建物，最近以比買入價少三百萬港元嘅售價「左手交右手」，但不同嘅係，今次業主冇咗阿女個名，莫非係見呢排樓市淡靜，用呢啲手法製造成交量，從而將樓價穩住喺某個水平？
僭建水池排水系統遭罰款
據土地註冊處資料顯示，潘樂陶與阿女潘穎欣持有嘅屯門海詩別墅三號屋，本月以二千四百萬港元轉讓，並將阿女「除名」。翻查資料，上述物業舊年因涉嫌僭建水池和排水系統，畀法庭裁定違反《建築物條例》，判罰款兩萬港元。
其實幢物業係潘樂陶於二○一二年十月以約二千七百萬港元買入，之後同年十一月加入阿女個名共同持有。然而，最近樓市前景唔明朗，鄭若驊個老公同阿女偏偏揀喺呢個時候，以比買入價低逾三百萬港元嘅售價「左手交右手」，其背後動機確係耐人尋味。