政情：激辯「港版國安法」 李梓敬：實施後第一個舉報羅冠聰
全國人民代表大會將審議「港版國安法」，並於本周四表決。建制派李梓敬同喺宣誓風波中被褫奪立法會議席嘅香港眾志常委羅冠聰尋日出席電台節目時，因為對「港版國安法」嘅睇法不同而進行激烈辯論，辯論過程中李仲話要舉報羅添！
羅曾呼籲外國制裁香港
李梓敬發言嘅時候話，市民毌須對「港版國安法」太過擔憂，又話犯法嘅人先驚，奉公守法就一啲都唔使驚，不過羅冠聰就要驚啦，李鬧爆羅先前呼籲外國制裁香港，又推動《香港人權與民主法案》，惹來外部勢力干預；又指出眾志喺一六年立法會選舉期間，表明支持自決亦不排除港獨，有分裂國家之嫌。
李又話「港版國安法」訂立咗之後，第一個就舉報羅冠聰！羅就回應話知道自己係中央嘅「眼中釘」，唔需要李嘅提醒。其實「港版國安法」嘅細節仲未敲定，如果真係設有「追溯期」，唔知李係咪會舉報羅呢？