政情：港協暨奧委會 自選監管小組 議員斥圍威喂

審計署曾質疑遴選過程欠透明

事緣前年亞運蛙泳比賽項目嘅選手遴選過程被質疑不公平，當時最快紀錄嘅泳手獲報名推薦參加比賽但冇入選，同埋遴選條件至今都冇公開，審計署早前公布嘅報告都有就呢方面提出質疑，又指該會到依家仲未落實廉政公署喺二○一一年出版有關運動員選拔等嘅《體育總會防貪錦囊》。

立法會政府帳目委員會尋日召開公開聆訊，一眾議員都主要針對遴選機制嘅透明度去審視港協暨奧委會呢筆糊塗帳。雖則港協暨奧委會義務秘書長王敏超話，如果選手不滿遴選結果，可按現行機制透過所屬總會要求覆檢，又設有上訴委員會畀選手提出上訴。

惟有關說法引起多名議員質疑，所謂嘅「上訴委員會」從未接獲任何上訴，又冇上訴程序可以跟隨，令選手根本無從投訴。帳目委員會主席石禮謙都忍唔住點出，港協暨奧委會有關成員與總會成員重疊，質疑好易造成「圍威喂」嘅情況。

採購冇招標報價 疑涉利益輸送

另外，港協暨奧委會盤數亦搞到一鑊泡，赤字喺短短五年間激增十六倍，而好多採購都冇招標報價，令帳目唔清唔楚，難免令人猜測當中係咪涉及利益輸送。

針對港協暨奧委會管理不善嘅問題，民政事務局話由二○二○至二一年度開始會向該會撥一筆為期五年、每年五百萬元嘅限時撥款，以成立一個專責小組檢視各體育總會嘅運作同內部監管機制，包括制訂一套管治守則，檢視各體育總會財政報告及審計機制、運動員遴選及上訴機制等，以提高管治水平及透明度。

雖則王敏超話對專責小組有初步計劃，指會成立由獨立專業人士組成嘅義務督導委員會喎，但人選又喺由港協暨奧委會挑選，其改革決心有幾大實在不無疑問。至於義務督導委員會最終會否淪為一場粉飾太平嘅公關秀，睇嚟大家只可以放長雙眼喇。