中環出更：男女購物習慣不同 陳祖恒：陪太太行街都係享受
每個人購物都有唔同準則，男女之間購物嘅習慣就更加唔同。好多時女士都好享受行街嘅過程，買唔買到嘢未必重要，男士就多數已經諗好要買乜，一去到店舖就一擊即中。香港工業總會副主席陳祖恒話自己通常睇中一件貨物先會去買，而太太就成日都window shopping，不過佢話陪太太行街買嘢都係一種享受嚟嘅。
除咗陪太太買衫，陳祖恒都會同太太一齊行超市同街市買餸，就連啲菜幾錢一斤都知喎！陳話身為三個小朋友嘅爸爸，佢比較着重食物產地來源，以及成分，所以買嘢食時都會好留心咁睇食物標籤o架！
香港優質標誌局副主席孫榮聰就話自己買嘢重視美觀同設計，最好就價廉物美啦，不過現實就係靚嘢都唔會賣得平。孫話佢媽媽都好鍾意行街買嘢o架，但疫情關係惟有叫媽媽留多啲喺屋企啦，平時咪一齊上網買吓衫同家庭用品囉！
葉中賢：網購會揀用開嘅牌子
工業總會總裁老少聰都好似孫榮聰所講，認同價廉就未必做到物美，佢認為有啲貨品的確好平，但可能用過一次就唔用得，所以佢買嘢會以質素為首要考慮，而佢個人就比較鍾意見到實物先，摸吓先去買，佢舉例話買口罩都要揀個自己戴過上臉、真係啱用嘅牌子啦。
工業總會主席葉中賢就指，唔係所有商品都得到第三方機構發出品質認證，好似波鞋咁，所以佢會買着開嘅牌子，最緊要都係着落舒服嘛，而買西裝都係搵相熟嘅師傅訂造o架。葉中賢話每逢網上購物，都會選購用開嘅牌子，咁咪唔驚網購「中伏」囉！
卓妮