政情：區會削撥款玩報復 新丁徐英偉難拆局

葵青油尖旺荃灣皆出手

民政總署早前以抗疫為由，削減全港各區區議會嘅「社區參與撥款」，惹來泛民強烈不滿。其中，被削金額最高嘅葵青區議會，日前就以削減聘請民政處非公務員合約職員撥款開支作反制；油尖旺區議會隨後亦通過，暫停所有由民政總署委任嘅分區委員會撥款申請，以作報復。

至於被民政總署削減咗五十七萬元「社區參與撥款」嘅荃灣區議會，尋日先開會討論今個年度嘅撥款分配。會議期間，區議員趙恩來提出修訂動議，將原定撥畀「分區委員會」嘅二十一萬八千元，同撥畀「公民教育委員會」嘅二十萬元款項削減為零；同時削減原定撥畀當區民政處嘅其中十五萬元撥款，三項修訂合計可以慳番五十七萬元，變相可以抵銷民政總署早前削減咗嘅金額。相關修訂動議最終喺十五名區議員贊成下獲通過。

趙恩來話兩個委員會嘅成員主要由民政處委任，認為其組成並唔民主，亦代表唔到居民，而且主要都係搞啲「蛇齋餅糉」活動，所以不如削咗佢哋啲撥款。之不過，兩者加埋只得約四十二萬，所以趙決定將另外嘅十五萬元喺民政處身上開刀；又提到當區民政事務專員葉錦菁喺佢哋討論嘅過程中並冇出聲，估計佢本身都預咗會出現呢個情況。

民政專員會上粒聲唔出

該區區議會主席陳琬琛亦都話，葉錦菁喺會上對削撥款冇特別意見，又話了解到即使削減咗撥款，亦唔會影響秘書處嘅人手安排。不過，陳話自己做咗咁多年區議員，都係第一次見區議會咁樣畀民政總署削撥款，仲話若下年度民政總署再削區議會資源，相信屆時區議員嘅反應會更大。

話時話，民政事務局局長徐英偉日前回應區議會亂局時，就形容過區議會係遊樂場，只要遵守規矩，就能夠玩得好開心。依家泛民區議會跟足程序修訂撥款，唔知徐又有乜嘢招數應對？