政情：終止審電子煙草案 仲未有共識
負責審議電子煙法案委員會傾咗成一年幾，分歧都仍然好大，早前委員會主席郭偉強亦都建議終止討論，但未能喺十一個委員當中取得大多數共識，故委員會將喺六月二日再召開會議討論未來工作路向。
葛珮帆料今屆會期內不能完成
委員會副主席葛珮帆（EQ）預料，即使繼續開會，但本屆會期將於七月中結束，認為條例草案喺呢屆議會通過唔到。
立法會審議《二○一九年吸煙（公眾衞生）（修訂）條例草案》委員會，郭偉強早前提出終止討論建議，但據秘書處文件顯示，有關建議未能取得大多數委員共識，故再安排會議討論未來工作路向。
至於「未來工作路向」指啲咩？EQ話都唔清楚喇，但佢強調自己支持全面禁煙，即使之前有煙草商試過游說佢都冇動搖過咁話。其實班委員對禁電子煙喺有共識，郭偉強早喺舊年都建議過政府將禁電子煙同加熱煙分開處理，免得撼頭埋牆，如果政府當初聽勸，話唔定唔使傾咁耐都未傾掂啦！