政情：防疫質詢用字不當 郭家麒遭炮轟
議員郭家麒尋日喺立法會質詢有關醫護人員喺疫情爆發初期罷工同埋裝備問題，當提到「武漢肺炎」呢個字眼，即惹來多位建制派議員不滿，怒斥用字唔恰當，以及帶有歧視成分。議員黃國健話，《議規》無提及質詢用字方式，認為大會主席梁君彥可以運用《議規》第九十二條，為《議規》未有規定嘅程序進行裁決。議員何俊賢就要求，立法會行政管理委員會應討論係咪規管有關用字，不過郭家麒就反駁話「唔好咁玻璃心。」
病毒命名 梁君彥促跟世衞
立法會主席梁君彥就話，雖然世衞已將病毒命名為「二○一九年新型冠狀病毒」，希望議員盡量運用，但有關質詢用字經過秘書處詳細審議先至批准，並無違反《議事規則》，又話加入病毒嘅俗稱屬於補充資料，又提醒大家唔好難為秘書處同事。
衞生服務界議員李國麟亦寸爆咁話，有建制派議員因為爭拗病毒名稱而退席，而唔去監察政府防疫工作，令到佢「大開眼界」。