政情：張可森議辦貼鼓吹違法告示 民政總署促移除
民政事務總署（民政總署）近日收到多個投訴，指屯門區議員張可森，喺其辦事處張貼寫上「屯門特訓」、「讓革命融入生活」嘅告示，有鼓吹參與不法行動之嫌。民政總署發言人尋日表示，張可森於其辦事處外張貼上述告示，有關行為違反《區議員及區議會轄下委員會成員操守指引》，民政總署已發信予相關議員，強烈勸喻佢必須盡快將有關告示移除，以免引起社會不安，影響地區和諧。
民政總署亦提醒區議員喺使用公帑時，須遵守公開、公平同問責嘅原則，以及用於執行區議會職務。相關議員喺其辦事處外張貼上述告示未能合乎《酬津指引》內嘅指導原則同有關規定。
投訴已轉介屯門區會主席
此外，民政總署亦已轉介相關投訴予屯門區議會主席跟進，希望屯門區議會能秉公處理，確保議員嘅言行唔會危及或損害其個人誠信、公正、客觀判斷力或履行職務嘅能力，令區議會嘅信譽受損。
