政情：平權修例歎慢板 朱敏健寸爆死撐 議員圍插
香港推動《性別歧視條例》多年，但一直都遭人詬病話漏洞多、唔完善，直到今年一月先至刋憲建議，將騷擾餵哺母乳嘅女性定為違法，但其他涉及性傾向同性別歧視嘅保護法例就一直未有下文，平等機會委員會主席朱敏健尋日去立法會政制事務委員會匯報工作進度時，就畀班議員輪流炮轟，話鬧佢做嘢「得把口」，處理個案又雙重標準。之不過朱都唔係省油的燈，同班議員逐一駁火，又話自己做事風格同判斷絕非如議員所言，令到出咗名牙尖嘴利嘅議員都忍唔住爆咗句「你都好寸吓」添啊。
話說近日社會上出現多宗涉及歧視嘅事件，例如有食肆喺餐廳門口張貼告示，表明唔招待講普通話嘅人士。朱敏健都話留意到近年愈來愈多涉及身份歧視嘅個案，尤其係歧視新移民嘅個案，但根據現行四條反歧視法例，未賦予權力畀平機會處理包括身份歧視在內嘅歧視現象，但至於就相關範疇立法嘅研究，則會持開放態度喎。
指若跟建議 同郵箱冇分別
議員葉劉淑儀聞言，就話朱「得把口」，指社會上有好多聲音，要求有關方面修例以提供保護，平機會應該主動就政見、口音等歧視行為向政制及內地事務局提出立法建議先啱。之但係朱就對葉劉嘅批評不以為然，認為自己做嘢有根有據，仲寸葉劉嘅一番言論係基於佢「大隻講」嘅錯誤假設，覺得如果依照葉劉嘅建議嚟辦事，咁同個「郵政信箱」冇乜分別，又指「左手嚟右手去」絕對唔係佢嘅處事手法喎。
郭家麒忍唔住：你都好寸吓
呢番說話可謂激到葉劉「紮紮跳」，反駁話：「你有冇讀過書(口架)？我有咩錯誤啊？我寄本書你睇啊！」但朱就懶理對方發火，堅持葉劉說法有誤，搞到葉劉嬲嬲豬咁拋下一句：「你應該畀人炒魷魚啊！」朱同葉劉嘅激烈駁火，令到場邊食花生嘅議員郭家麒發言時都忍唔住話，平時見過咁多官員，亦見過多屆平機會主席，但今日見到朱嘅言詞反應，都可以話「你都好寸吓」。
至於議員陳志全就狠批平機會多年來做嘢慢，又指平機會雖然自二○一六年，推出一份好詳細嘅「禁止性傾向性別認同及雙性人身份歧視」研究，惟四年來先後經歷周一嶽、陳章鳴，以及到現任嘅朱敏健，都未有積極推動有關立法工作，並形容係「石沉大海、苦無寸進」，又從冇公開回應過。而朱就只係話，立法工作屬於政府嘅職權，而平機會只可提供建議。