中環出更：積金法案委會 張華峰秒速當選主席
本屆立法會內務委員會足足舉行咗十八次會議，先至選出內會主席。而喺上次特別內會中成立嘅《二○一九年強制性公積金計劃（修訂）條例草案》委員會，就喺尋日召開第一次會議，兼且只係用咗十秒就火速選出主席，仲即刻開始討論議程添。
由石禮謙主持
會議由地產及建造界議員石禮謙主持選主席工作，進出口界議員黃定光提名金融服務界議員張華峰，得到金融界議員陳振英嘅和議。於是張華峰喺冇競爭對手嘅情況下當選，加上全員認為唔需要選副主席，所以就即刻進入討論事項啦，真係夠晒效率呀！
進入討論事項後，政府官員就即刻被議員抽秤啦。石禮謙發言期間話打工仔辛苦搵錢，但強積金嘅回報率就「一年驚過一年」，話唔知打工仔退休拎到嘅強積金，筆錢足夠買到花生定係只夠買到碗飯。石又批評政府依家淨係拎條條例上法案委員會「係咁意改小小」，質疑政府並冇打算趁早做番好，根本冇為打工仔着想囉！
另一邊廂，就唔係個個委員會咁好彩夠人成立。根據《內務守則》，每個小組委員會須由不少於三名委員組成，而早前已有四個委員會因未能達到人數下限而不能成立，尋日《二○二○年空氣污染管制（車輛設計標準）（排放）（修訂）規例》小組委員會都因此而成立唔到。據秘書處指出，喺截至報名前，只有石禮謙表示會加入該委員會。
卓妮