中環出更：銅芯口罩傳有害 陳志豪促政府解畫
疫情雖有緩和迹象，但為己為人，市民仍需繼續戴口罩。政府早前宣布向全港市民派發可清洗嘅銅芯口罩，儘管係不收分毫，不過就有人覺得口罩嘅外觀好肉酸，又有傳聞指口罩嘅銅芯對人體有害，唔知各位收到口罩嘅用家又點睇呢？
香港廣西社團總會副會長陳志豪（Victor）就覺得口罩無想像中咁焗，但望上去嘅顏色唔好睇，好似底褲咁。Victor有幫太太申領口罩，但太太話網上有文章指口罩嘅材料唔安全，所以唔敢用，Victor認為政府應該要盡快解畫，以釋除市民嘅疑慮。雖然口罩可以清洗六十次，Victor就話好難計住洗咗幾多次，而自己又嫌麻煩懶得洗，平時食飯嗰陣又唔知可以將個口罩擺喺邊。Victor話就算佢幫街坊登記口罩，佢哋都唔算踴躍，形容政府今次派口罩就猶如遲來的春天。
孫蔡吐媚建議出多幾種色
口罩要日日洗，但全部一樣色，一家人嘅口罩洗完晾乾好容易撈亂再撈亂，經營服裝商標製造嘅仁濟醫院副主席孫蔡吐媚就話冇有怕，佢哋自己縫番個人名標籤上去咪得囉！不過佢都建議政府日後如果會推出第二批口罩，不妨考慮推出多幾種唔同嘅顏色，方便市民分辨，況且睇落都靚啲嘛！
健康快車香港基金創會主席方黃吉雯，就話戴過銅芯口罩之後，並唔覺好似其他人講到咁焗，反而都算幾舒服嘅，方太都唔介意要洗口罩。被問到點睇依家口罩嘅顏色，會唔會想改善吓外觀，方太就話唔使搞咁多嘢喇！因為佢最希望嘅都係疫情快啲過，咁就大家都唔使再戴口罩啦！
卓妮