繼禁電子煙嘅草案可能中止審議後，有關引入專營的士嘅草案亦恐難產。負責審議立法會《專營的士服務條例草案》委員會主席張宇人話，委員會由舊年六月至今已召開三次會議，但受到新冠肺炎疫情影響，今年有兩次會議需要取消。佢又話距離現屆會期完結得番兩個幾月，委員會仲要進行一百二十人嘅公聽會，及後又要處理草案條文同議員可能提出嘅修訂，估計會議時間不足。佢又話假如草案未能喺今個會期內通過將會失效，審議工作要喺下屆立法會重新開始。
政府早喺一五年十一月推出專營的士嘅建議，諮詢立法會交通事務委員會後，當局計劃批出專營權，等承辦商推出不多於六百架可供網約嘅專營的士。政府將會規定的士嘅車輛類型同埋車廂設施，又建議起錶收費三十六元，較依家嘅的士貴近一半。
多名的士業界代表喺今年初召開嘅首場公聽會中，表明反對引入專營的士，認為只會進一步打擊業界生意同加劇司機人手不足問題，要求當局撤回方案，並先改善行業質素同司機收入。競爭事務委員會舊年底亦質疑政府推出嘅計劃無助滿足公眾對改善的士質素嘅要求，又批評政府對現有的士過度規管，促請政府為的士行業進行改革。