中環出更：反修例案檢控慢 鄭若驊被批懶懶閒
舊年六月本港反修例風波開始引發連串示威衝突，拘捕咗好多涉事者，但至今有唔少相關案件仍然喺法庭排期審理。有議員尋日喺立法會會議上批評律政司有責任撥亂反正，仲建議要求增加人手處理。
喺上年連串衝突當中，被捕人士數以千計，所涉嘅案件眾多。今年本港爆發新冠肺炎疫情，政府亦實行在家工作制度，司法機構亦有跟隨暫停辦公，所有聆訊延期，而期間亦都只處理緊急同埋必要案件嘅申請。
議員轟判刑過輕 憂鼓吹暴力
過去都有唔少建制派議員建議，律政司應參考英國過去處理暴動案件嘅做法，成立廿四小時特別法庭，用作加快審議案件，但係民望「墊司底」、被嘲為「避政司司長」嘅律政司司長鄭若驊冇任何動作，亦有議員曾批評檢控嘅工作太慢。
眼見依家情況同埋進度，身為律師嘅議員周浩鼎尋日就喺立法會會議上，指上年本港發生多宗暴力事件，依家未檢控嘅案件宗數非常多，又話曾經建議律政司盡快增加人手處理。佢仲話有啲案件嘅判刑過輕，擔心會令人覺得會鼓吹暴力，認為律政司有責任覆核相關案件嘅刑期，同埋撥亂反正喎。
卓妮