中環出更：盼禁聚令結束 黃國權想派飯贈長者
疫情持續咗幾個月，到近日有緩和嘅迹象。愛心飯團創辦人黃國權（Danny）日前應邀出席一個抗疫活動時，形容自己心情好心急，直頭好想「禁聚令」喺下一個限期屆滿後取消，等佢可以快啲派番飯盒同口罩畀老人家。
由於早兩個月疫情仍然嚴峻，Danny嘅派飯盒同口罩活動被迫暫停咗個幾月，令佢冇咗一個好大嘅寄託。雖然「禁聚令」由原本限制四人以上聚集放寬至八人，但佢驚太多人聚集或會被票控，所以唔敢同一班義工舉辦同類型嘅活動，避免受到票控。不過，佢話參加抗疫活動都好，希望透過派發口罩、消毒搓手液等防疫用品畀有需要嘅人，發揮互助互愛精神。
歐宏亮：魔術師生計大受打擊
當日嘅抗疫活動係由虹亮善美基金會同香港抗疫站合辦，基金會主席歐宏亮（Eddy）本身係魔術師，佢話魔術屬於表演同娛樂性質，生計亦同樣受到疫情影響而大受打擊，並無任何收入，但因為「禁聚令」放寬，Eddy話上個星期五能夠重新進行教學工作，例如喺工會裏面開設長者魔術班，佢仲話班長者上堂都上得好開心，又話佢玩魔術超過四十年，最大得着係將興趣變成事業，而帶畀人歡樂就係佢最大嘅滿足感。
同場仲有家居維修義工協會創辦人陳漢文（Ivan）、能量書畫家魏士傑（Ricky）、潮流車義工隊創辦人霍兆堅同香港抗疫站總召集人陳偉傑等人。Ivan話由於疫情關係，唔少求助人擔心病毒會經喉管傳播，令檢查喉管嘅個案都比較多，佢又期望透過定期開班，訓練年輕人學習基本家居維修技巧，例如水電方面知識，服務社會同改善有需要人士嘅家居環境。Ricky就話疫情期間工作量大減，但反而令佢多咗時間鑽研書畫同落區，亦加深咗同人之間嘅聯繫。
卓妮