政情：公民講場：藉口一堆冇誠意 電動巴得個等字

政府經常話要推動香港邁向綠色城市，然而要等到幾時電動雙層巴士先至可以普及呢？尋日立法會環境事務委員會討論研究電動車發展相關事宜，環境局副局長謝展寰就話香港多斜坡、充電場所佔地龐大、電池效能未如預期，總之理由一大堆，講到尾就係唔會積極引進電動雙層巴士囉。雖然謝又話未來數年相關技術會出現重大突破，到時先至再大規模引進。但目前技術較為成熟嘅電動私家車，政府採用嘅比例亦偏低，對於電動雙層巴士嘅普及，政府可以有幾大誠意，實在不無疑問，難怪有議員批評話「得個等字」。