政情：工會轟公關手段粉飾太平 自吹自擂抗疫邀功 政府活在平行時空

沉醉「被世人誤解」自說自話

香港公關及傳訊業總工會昨日鬧爆政府，話公關非萬能，政府為項目招標都唔能夠挽回國際形象，仲大鬧政府從未正視問題癥結，反而繼續沉醉於「被世人誤解」嘅平行時空自說自話，妄想以公關手段化解危機，全無回應政治危機嘅意欲，狠批政府過分天真且不切實際，無法令香港重拾國際形象。

根據工會引述，政府在招標文件中話「港府處理是次（新冠肺炎）疫情的表現良好，惟社會普遍仍對政府的行動感到負面。」工會就駁斥，話近日疫情逐漸受控係有賴於市民努力，而政府漠視民意、顛倒是非，仲「袋錢入政府袋」，話最有效嘅危機管理公關工程係承擔責任、立足事實以及同持份者建立良好、真誠、互信嘅關係。

學者：爭民望反變緣木求魚

香港理工大學專業及持續教育學院講師陳偉強亦批評政府「自吹自擂」，市面上早前出現口罩荒，政府冇辦法穩定口罩供應；而政府喺三月中宣布將會對多國入境人士實施強制檢疫，搞到大量留學生喺限期前「衝關」回港，迎來疫情第二波爆發，由此可見政府嘅抗疫工作根本未做足，反問點會係表現良好呢？

陳仲話，咁多間公關公司拒絕同政府合作，政府應該反省吓，又話硬性宣傳亦有可能變成浪費納稅人金錢，相反如果政府表現好，根本就唔需要畀錢搵人宣傳啦！陳估計政府只不過想藉着抗疫措施增加民望，但點知做到「甩甩漏漏」，搞到事與願違，未能獲取政治籌碼，反而變相係「緣木求魚」，睇嚟去年八月上任嘅新聞處處長鄭偉源真係要審視吓政府嘅公關策略喇。