中環出更：疫情促進再工業化 劉燊濤：生產防疫品有得諗
愈來愈多香港製造嘅口罩喺市面上出售，以滿足港人對防疫產品嘅殷切需求。葵涌扶輪社社長劉燊濤就認為港商設立本地口罩生產線，對促進港再工業化有好大幫助，況且口罩將來會成為市民嘅必需品，而廠商有咗相關技術，仲可以整埋其他產品，例如尿片。
劉話自己主要出口鐘錶去歐美地區，但當地疫情嚴峻，搞到好多訂單都取消或者延遲，佢惟有叫工廠嘅工人放假。佢話鐘錶唔係必需品，就算當地社會開始恢復，都會先復甦飲食業而唔係鐘錶業。佢話自己應該唔會轉型生產口罩，因為太多人整喇，但如果生產其他防疫物資好似膠手套、保護衣同消毒酒精咁都諗得過o架。
彭徐美雲：港產口罩予人信心
耀能協會主席彭徐美雲指兩、三個月前大家到處撲口罩，較諸產地不明嘅貨色，港產口罩特別予人信心，而佢亦有幾位朋友因應今次疫情，設立本地口罩生產線。不過彭太話，唔好以為多咗幾間口罩工廠，有助提高本地就業機會，因為生產口罩嘅自動化程度好高，對勞動力嘅需求唔係咁大。
稻苗學會會長黃傑龍，就話相較於一次性嘅口罩，佢更欣賞港產嘅可重用布口罩，優點係有助環保，慳番唔少一次性口罩就好似銀行戶口多咗錢咁。但由於每日使用過後都要清洗同晾乾，所以佢需要兩個布口罩梅花間竹咁隔日替換。不過黃傑龍認為一次性口罩亦有其好處，就係同人講嘢人哋會聽得較為清楚，布口罩就反而好似隔咗一堵牆，所以如果一旦遇上開會或較多發言機會嘅場合，咁就要有一次性口罩傍身喇。講起防疫用品，佢早前亦於網購平台購入一枚呈勾狀，黃銅材質嘅開門撳掣神器，佢話銅離子可以抗菌消毒，所以無論升降機撳掣抑或開關水喉，佢都盡量使用呢件神器以保障個人衞生。
卓妮