灣仔區議會早前就通過動議，煞停造價逾一億三千萬元嘅「摩頓臺社區活動中心」呢個「小白象工程」，但政府就懶理繼續工程。區議會尋日再就工程項目開會討論，雖然班區議員想將成個項目推倒重來，不斷圍攻政府會唔會就「停止工程」再做諮詢，但政府就企硬唔會終止工程，仲話會盡一切努力完成個工程喎。
喺尋日嘅灣仔社區重點項目工作小組會議上，班區議員主要針對工程嘅詳細分項花費、會唔會就「停止工程」再做諮詢、公開工程合約內容條款、工程嘅詳細設計圖則等圍攻班官，惟出席會議嘅建築署代表都無答案，仲畀小組主席楊雪盈窒佢「究竟知唔知自己起緊啲咩？」
被再三追問下，建築署代表就話已批出涉款一億一千五百萬元嘅合約總額，包括總承建商、升降機分判商和供應裝備分判商合約，後兩者分別涉款二百二十五萬元同二千二百八十萬元。
之不過「公開合約內容條款」同就「停止工程」再做諮詢方面，民政事務總署助理署長鍾雅之就企硬回絕，講到明工程合約係機密文件唔會公開，又話工程已經開展，署方唔會終止工程，更加唔會再就「煞停工程」做諮詢，仲話會盡一切努力完成個工程喎。
楊雪盈最後就話要喺半個月內進行一個社區公聽會，畀將來有份使用活動中心嘅持份者發表意見，而政府官員就話會配合。