政情：涉政治宣示 泛民區議員被拒用主席房
繼民主派中西區區議員前日被民政事務處禁止使用會議室舉行會議，尋日再有葵青區議員，遭該區民政處以涉及政治宣示為由，被拒使用設於葵青民政事務處裏面嘅區議會主席房間召開記者會，最終記者會需改往其中一名區議員嘅辦事處召開。
轉以議辦召開記者會
話說六名打算喺尋日召開記者會嘅區議員，前晚接獲秘書處通知，指出相關區議員皆屬同一政見，認為記者會屬政治宣示，拒絕佢哋使用區議會主席房間召開記者會。多名區議員於是就喺尋日朝早，前往葵青民政事務處張貼告示，通知到場採訪嘅傳媒，需改往其中一人嘅辦事處出席記者會，期間有警員步入民政事務處提醒在場人士，若繼續於該處召開記者會，有可能觸犯禁止四人以上聚集嘅禁聚令。當警員離開後，接踵而至嘅民政處職員，向一眾區議員重申，唔可以使用主席房召開記者會，又強調秘書處並無阻撓佢哋嘅工作。最終記者會轉至吳劍昇位於葵芳邨嘅區議員辦事處舉行，會上吳及其他區議員皆就此表達不滿。